Patay ang usa ka 25-anyos nga drayber sa motorsiklo human nakigbangga ang iyang gisakyan nga Yamaha Aerox sa usa ka Isuzu Elf truck samtang nagbiyahe sa Provincial Road sa Purok 1, Barangay Liboran, Baungon, Bukidnon kaganihang buntag, Agosto 15, 2026, mga alas-6:30.
Subay sa inisyal nga imbestigasyon sa Baungon Municipal Police Station (MPS), paingon sa amihanang direksyon sa Cagayan de Oro City ang motorsiklo nang giingong nisuway kini pag-overtake sa nag-unang sakyanan. Apan sa gihimo nitong pag-overtake, nakigbangga kini sa nagsugat nga Isuzu Elf truck nga gidrayban sa usa ka 40-anyos nga lalaki.
Tungod sa kusog nga impak sa pagkabangga, gidanlak sa karsada ang drayber sa motorsiklo nga nakaangkon og grabeng samad sa nagkadaiyang bahin sa iyang lawas. Gidali pa kini pagdala sa Baungon Municipal Health Center apan gideklarar nga dead on arrival (DOA) sa opisyal nga doktor. Sa kasamtangan, gitanggong sa Baungon MPS ang drayber sa truck kauban ang duha ka sakyanan samtang nagpadayon ang imbestigasyon ug pormal nga disposisyon sa kaso.