Gipahugtan sa Bukidnon Police Provincial Office (BukPPO) ang kampanya batok sa loose firearms ug mga ilegal nga armas aron mapugngan ang sunod-sunod nga insidente sa pagpamusil nga natala sa nagkadaiyang bahin sa probinsya.
Gipadayag ni PCAPT Shiela Joy Jangad, tigpamaba sa BukPPO, gipangusgan sa kapulisan ang pagpatuman sa Oplan Katok, Oplan Bakal-Sita, intel-driven operations, ug ang pagpa-alagad sa mga search warrant. Gipahugtan usab sa kapulisan ang pag-inspeksyon sa mga nagmotorsiklo sa mga checkpoint sanglit kasagarang gigamit kini sa mga riding-in-tandem nga suspetsado sa pag-atake.
Taliwala sa maong mga insidente, gipasalig ni Jangad nga naningkamot ang kapulisan ug kontrolado ang sitwasyon sa kasegurohan sa Bukidnon. Gipahayag usab niya nga padayon ang ilang paggukod sa mga nakahimo sa maong krimen aron mapahamtang ang hustisya sa mga biktima ug mapanalipdan ang kalinaw sa probinsya.