Nasikop sa mga awtoridad ang usa ka 41-anyos nga lalaki human niining gitigbas sa ulo ang usa ka 40-anyos nga mag-uuma tungod sa lalis bahin sa gipundok nga mga sanga sa kape sa Purok 4, Barangay Sil-ipon, Libona, Bukidnon niadtong Sabado sa udto, Agosto 15, 2026.
Subay sa imbestigasyon sa Libona Municipal Police Station (MPS), naglimpyo ug nagputol og mga sanga sa kape ang biktima ug gibutang kini sa agianan samtang naniudto. Hapit nadisgrasya ang suspek nga nagsakay og motorsiklo tungod sa mga sanga, diin sa iyang kasuko, iyang gipangita ang biktima ug nakiglalis kini sa balay diin kini naniudto.
Nihawa ang suspek apan mibalik kini nga nagdala na og sundang nga adunay katas-on nga 19 pulgada ug sa walay pagduhaduha gitigbas ang biktima sa wala nga bahin sa ulo. Human sa insidente, boluntaryong mitugyan ang suspek sa mga mirespondeng pulis ug kasamtangang gitanggong sa Libona MPS kauban ang nakuha nga hinagiban alang sa pormal nga pagpasaka og kaso.