Nakatala ang bag-ong rekord sa Poland human gipasidunggan ang 55.6 metros nga estatwa ni Birheng Maria nga gituohang pinakataas sa tibuok Europe.
Mitambong sa seremonya sa pagbendisyon sa monumento ang kanhing anti-communist leader sa Poland nga si Lech Walesa.
Nahimutang ang maong estatwa sa baryo sa Konotopie sentro nga bahin sa nasod ug adunay gitas-on nga 55.6 metros o 182 feet.
Gatosan ka tawo ang mitambong sa maong okasyon diin adunay mga gagmay nga pula nga rosas nga gipanglupad gikan sa mga helicopter samtang nagpahigayon og misa ang mga pari.
Nagpasundayag usab og tradisyonal nga mga awit ug sayaw ang bantog nga Mazowsze folk ensemble.
Mas taas ang maong estatwa itandi sa bantog nga Christ the Redeemer sa Brazil nga adunay gitas-on nga mokabat sa 38 metros apil ang pedestal niini.
Lakip sa kinatibuk-ang gitas-on sa monumento sa Poland ang 15 metros nga pedestal nga porma og korona.
Nalabwan usab niini ang Christ the King statue sa Swiebodzin, kasadpang Poland, nga adunay kinatibuk-ang gitas-on nga mokabat sa 52 metros ug gipasidunggan niadtong 2010.