Hugot nga gihimakak ni Bicol Saro Party-list Rep. Terry Ridon ang pamahayag ni Batangas 1st District Rep. Leandro Leviste nga adunay pipila ka kongresista nga nakadawat og tag-P2 milyong Christmas bonus human ma-ratipika ang Bicameral Conference Committee report sa 2026 national budget.
Matod ni Ridon, sayop ug makalilibog ang maong pasangil tungod kay ang gihisgotan nga pondo kabahin sa Maintenance and Other Operating Expenses (MOOE), nga gigamit alang sa operasyon sa opisina, sama sa papeles, bolpen, kagamitan, ug opisyal nga kalihokan—ug dili personal nga kwarta.
Giklaro pa niya nga dugay na kining regular nga pondo sa nagkalain-laing administrasyon ug walay kalabutan sa pagbotar pabor o supak sa bisan unsang balaodnon, lakip ang national budget.
Sa laing bahin, gihimakak usab ni House Deputy Speaker ug Antipolo Rep. Robbie Puno ang alegasyon, nga miingon nga dili kini bonus kondili pondong moagi sa audit ug kinahanglan gamiton sa mga kalihokan sa distrito sa mga miyembro sa House of Representatives.