Plano ni Mamamayang Liberal Partylist Representative Leila De Lima nga magduso og usa ka resolusyon sa Kamara de Representantes aron awhagon ang gobyerno sa Pilipinas nga lig-ong mobarog batok sa mga giingong abusadong pamahayag sa Chinese Foreign Ministry ug sa Chinese Embassy dinhi sa nasod.
Kini human miguwa ang mga kontrobersyal nga tubag sa embahada sa China batok sa mga opisyal sa nasod—sama nila Sen. Francis Pangilinan, ang National Maritime Council, ug ang Philippine Coast Guard—kalabot sa katungod sa Pilipinas sa West Philippine Sea.
Sa pakighinabi sa Bombo Radyo, gihulagway ni De Lima nga “dili madawat” ug “abnormal” ang gihimo sa embahada sa China. Matod pa niya, ang pagpamugos ug pag-atake sa mga opisyal sa Pilipinas pinaagi sa social media o opisyal nga pahayag maoy klarong paglapas sa Vienna Convention on Diplomatic Relations.
Dugang pa sa mambabalaod, angay untang agi sa saktong diplomatic channels ang bisan unsang pagpuna imbes nga idaan kini sa paningka ug pagpang-insulto. Gilauman ni De Lima nga suportahan ang maong resolusyon sa mga miyembro sa WPS bloc ug sa Liberal Party sa Kamarabaha aron mapahinumdoman ang maong embahada sa saktong pamatasan isip usa ka diplomatic mission.