Midangat sa sibyahan sa Bombo Radyo Malaybalay ang usa ka multicab driver nga naila sa alyas “Noy” aron ipaabot ang iyang mulo ug panawagan ngadto sa lokal nga kagamhanan kalabot sa nagpadayong programa nga “Libre Sakay.”
Sa iyang pahayag, gihangyo ni Alyas Noy si Mayor Jay Warren Pabillaran ug Konsehal Jayson Chad Ayala nga ikonsidera ang paghunong sa maong programa tungod sa dako nga epekto niini sa ilang inadlaw-adlaw nga kita. Matod niya, nag-atubang na sila sa grabeng kalisod tungod sa sige nga pagsaka sa presyo sa lana ug kakuwang sa pasahero, ug mas misamot pa kini tungod sa kompetisyon sa libreng sakay sa gobyerno.
Iyang gidugang nga usahay “zero balance” na lang ang ilang madala pauli sa ilang pamilya human sa pag-boundary ug pagpatubil, ilabi na nga gikatakdang mosaka na usab ang presyo sa gasolina sa mosunod nga mga adlaw. Gipahayag usab sa maong drayber nga wala pa sila mipasaka sa pletehan, busa ang libreng sakay sa gobyerno maoy hinungdan nga hapit na sila wala’y makuha sa ilang pagpamasahero.
Sa pagkakaron, ang Bombo Radyo Malaybalay nagpabilin nga abli alang sa opisyal nga pamahayag o tubag gikan sa buhatan ni Mayor Pabillaran ug Konsehal Ayala mahitungod niining maong reklamo sa mga drayber.