Dakong kapildihan ang nasinati sa mga lokal nga mag-uuma ning probinsya sa Bukidnon human masunog ug mamatay ang ilang mga pananom tungod sa grabeng kainit sa panahon.
Atol sa pakighinabi sa Bombo Radyo Malaybalay gibutyag ni Judy Salobo, usa ka mag-uuma sa dapit, nga bisan ang puhunan sa pagpananom niadtong Pebrero dili na nila mabawi tungod kay wala nay mapaabot pa nga ani karong panahona.
Gumikan niini, nanawagan kini og dinaliang pagtagad tungod sa dakong epekto sa El Niño sa ilang panginabuhian.
Dugang pa niini, masulub-ong gipadayag sa maong mag-uuma nga mikabat sa halos 75 porsyento sa iyang usa ka hektaryang maisan ang grabeng naapektuhan sa hulaw.
Bisan paman kon aduna’y bunga ang pipila ka mga mais, kini gagmay ug dili mapuslan tungod sa kakulang sa tubig.
Sa pikas bahin gipaambit usab sa usa ka mag-uuma ug kalihim sa Corn Growers Association ang iyang kabalaka nga dala posibileng pagkatap sa El Niño.
Matud kang Tessie Cabaldon, ang kalihim sa maong pundok, dako ang epekto sa grabeng kainit ilabina nga daghan sa mga mag-uuma ang nakapugas na ug anaa na sa yugto sa pag-abuno o “side dressing.