Gibutyag sa Philippine Statistics Authority o PSA nga mokunhod ang produksyon sa humay ug mais sa ikatulong kwarter sa 2026 itandi sa susamang panahon niadtong 2025.
Matud sa PSA, ang gibanabana nga produksyon sa humay gikan Hulyo hangtod Septiyembre 2026 mokabat sa 3.19 million metric tons, o 15 porsyentong mas ubos itandi sa 3.75 million metric tons nga aktuwal nga produksyon sa susamang panahon niadtong 2025.
Dugang pa niini, nga mokunhod og 15.8 porsyento ang area nga maani sa humay ngadto sa 771,790 ektarya, gikan sa 916,770 ektarya niadtong miaging tuig.
Samtang, gibanabana nga mokunhod og 14.4 porsyento ang produksyon sa mais ngadto sa 2.08 million metric tons, gikan sa 2.43 milyon metriko tonelada niadtong 2025.
Mokunhod usab og 12.8 porsyento ang area nga maani sa mais ngadto sa 688,030 ektarya, gikan sa 789,240 ektarya niadtong miaging tuig.
Matud pa sa PSA, upat ka tropical cyclone ang nakaigo sa sektor sa agrikultura gikan Hulyo hangtod sa sayong bahin sa Septiyembre.
Base sa final assessment sa Department of Agriculture, pinakadako ang kadaot ug lugi sa humay, nga mikabat sa P2.05 bilyon, samtang P127.60 milyon ang natala nga lugi sa mais.