Nakarekord og dagkong operational gains ang Police Regional Office 10 o PRO-10 sa unang 12 ka adlaw ni PBGEN Nestor C. Babagay Jr. isip Regional Director, pinaagi sa gipakusgang kampanya batok sa kriminalidad sa Northern Mindanao.
Atol sa press briefing, gipresentar ni Babagay ang resulta sa Enhanced Managing Police Operation o EMPO, nga nagtutok sa ilegal nga droga, illegal mining, smuggling sa sigarilyo, loose firearms, ilegal nga sugal, wanted persons ug Communist Terrorist Groups o CTGs.
Sa anti-drug operations, nakapahigayon ang PRO-10 og 104 ka operasyon nga mitultol sa pagdakop sa 126 ka drug personalities ug pagkumpiska sa 1,141 gramos nga gituohang shabu nga nagkantidad og P7.7 milyon base sa Standard Drug Price.
Sa kampanya batok sa illegal mining, 20 ka operasyon ang nahimo nga misangpot sa pagdakop sa walo ka indibidwal ug pagkumpiska sa mga kagamitan ug materyales nga mokabat og P4.4 milyon.
Sa cigarette smuggling, 62 ka operasyon ang gihimo, usa ang nadakpan ug nakumpiska ang gibanabanang P6.7 milyon nga gituohang smuggled cigarettes.
Samtang sa Kontra Boga campaign, 73 ka operasyon ang nahimo nga misangpot sa pagdakop sa walo ka indibidwal ug pagkumpiska sa 71 ka armas.
Sa kampanya batok sa wanted persons, 107 ang nadakpan, lakip ang 32 ka Most Wanted Persons. Sa illegal gambling, 10 ka operasyon ang nahimo, 18 ang nadakpan ug P5,911 nga mga iligal nga gamit sa sugal ang nakumpiska.
Sa kampanya batok sa CTGs, lima ka personalidad ang misurender ug tulo ka armas ang nakumpiska, gisurrender o nabawi.
Gipakusgan usab sa PRO-10 ang Safer Cities Initiative nga nagtutok sa police visibility, pagpatuman sa lokal nga mga ordinansa ug area-specific interventions.
Niresulta kini sa pag-account sa 10,030 ka violators, diin 4,853 ang gipamulta ug 4,897 ang gihatagan og pasidaan.