Nag-atubang og kakulang sa pondo ang City Government of Malaybalay alang sa medical assistance, burial assistance ug tambal human molapas ang mga gipirmahang bayranan sa kasamtangang budget.
Gibutyag ni Malaybalay Mayor Jay Warren Pabillaran nga P52 milyon na ang iyang napirmahan nga assistance para sa Abril, Mayo ug Hunyo, bisan P21 milyon lamang ang nasakop sa supplemental budget.
Matud ni Pabillaran, adunay P31 milyon nga kakulang alang sa maong panahon ug wala pa maapil niini ang mga bayranan sa Hulyo, Agosto ug Setyembre.
Dugang pa sa mayor, naghulat pa siya sa City Budget Office sa tukmang kantidad sa mga assistance nga iyang napirmahan aron masuta kung aduna pay laing tinubdan sa pondo.
Gilauman usab nga hisgutan sa sunod nga budget meeting ang posibilidad sa dugang nga alokasyon aron mapadayon ang paghatag og pinansyal nga tabang sa mga nanginahanglan.