Gipasabot sa usa ka eksperto sa balaod nga ang padayon nga legal nga lakang ni Vice President Sara Duterte, ilabi na ang pag-file niya og petisyon sa Korte Suprema aron kuwestiyonon ug ipahunong ang impeachment proceedings batok kaniya, nagpakita sa usa ka mas lapad nga isyu sa interpretasyon sa Konstitusyon ug sa sakup sa gahum sa hudikatura ug lehislatura sa nasud.
Ang maong petisyon nagtinguha nga ideklarar nga unconstitutional ang impeachment case ug ipawagtang kini tungod sa giingong depekto sa proseso nga gihimo sa Kamarabaha.
Sumala ni Atty. Oscar S. Moreno, lapad ang gahum sa Korte Suprema ilabi na sa ilawom sa 1987 Constitution, diin mahimo na kining motugot sa pagrepaso sa mga lihok sa gobyerno kung adunay giingong grave abuse of discretion.
Dugang pa sa abogado nga posible nga motaas ang isyu sa Korte Suprema sama sa nahitabo sa miaging impeachment, apan karon naningkamot ang Kamarabaha nga mosunod sa mga desisyon sa korte ug sa Konstitusyon.
Gituohan usab nga ang pagdoul sa Korte Suprema usa ka paagi sa kampo ni VP Sara aron mahunong o malangan ang impeachment proceedings, ilabi na nga nagkaduol na ang mga politikal nga panghitabo sa umaabot nga eleksyon.
Bisan pa niini, giila sa abogado nga ang impeachment usa gihapon ka pamaagi sa pagpangayo og tulubagon sa mga opisyal, apan giingon usab nga kini adunay politikal nga aspeto ug ang Korte Suprema kasagaran dili manghilabot gawas kon adunay klarong grave abuse of discretion.