Usa ka wala pa mailhing pedestrian ang namatay human mabanggaan sa Nissan Navara samtang mitabok sa national highway atubangan sa Polymedic Hospital sa Purok 12, Valencia City, Bukidnon, pasado alas 3:05 sa kaadlawon niadtong milabay’ng adlaw.
Base sa imbestigasyon sa Valencia City Police Station ubos sa pagdumala ni PLTCOL Bryan M. Panganiban, padulong sa Valencia City gikan sa Hagkol ang pick-up nga gimaneho sa usa ka 39-anyos nga lalaki dihang kalit nga mitabok ang biktima ug naigo sa wala nga bahin sa sakyanan.
Gidala dayon ang biktima sa ospital apan gideklara kining patay sa doktor takna sa alas 3:10 sa kaadlawon.
Ang drayber ug ang Nissan Navara anaa karon sa kustodiya sa kapulisan samtang nagpadayon ang imbestigasyon sa maong aksidente.