Hugot nga gibalibaran ni Philippine Coast Guard (PCG) spokesperson Commodore Jay Tarriela ang hagit ni Senador Rodante Marcoleta alang sa usa ka “friendly debate” mahitungod sa isyu sa West Philippine Sea (WPS).
Kini human gisugyot ni Marcoleta nga gusto una niya makig-debate ni Tarriela, kauban silang retired Justice Antonio Carpio ug Atty. Jay Batongbacal, sa dili pa niya dawaton ang imbitasyon sa PCG nga mobisita sa Kalayaan Island Group (KIG).
Matud ni Tarriela sa iyang social media post, dili mahimong pakisayran o subject sa debate ang soberanya ug ang legal nga katungod sa Pilipinas sa WPS.
“Andam ko makig-istorya bahin sa mga butang nga dili kaayo seryoso—sama sa pagkaon, fashion, o uban pang isyu sa katilingban—apan ang integridad sa atong teritoryo ug legal nga katungod sa West Philippine Sea dili angay lalyason o debatihan sa publiko,” matud sa opisyal.
Gidugang ni Tarriela nga ang katungod sa nasud sa WPS klaro na nga gipalig-on sa 2016 Arbitral Award ug sa Konstitusyon, busa kini usa ka “patriotic duty” ug dili na kinahanglan lalyason pa.
Sa pikas bahin, gidawat na ni retired Justice Antonio Carpio ang hagit ni Marcoleta, samtang nagpabiling barog ang PCG sa ilang mandato sa pagpanalipod sa kadagatan sa nasud.