Nagpahimatngon si Presidente Ferdinand Marcos Jr. sa mga ahensya sa gobyerno nga dili mosulay sa pagsumite kaniya og mga sayop o bakak nga report kalabot sa mga proyekto sa gobyerno nga ilang gidumala.
Sumala ni Palace Press Officer USec. Claire Castro, gihugtan sa Presidente ang iyang baruganan nga dili siya gusto makadawat og mga report nga “gipanindot” o kadtong gitawag og “pinapoging report.”
Gihimo sa Presidente ang maong pahayag atol sa usa ka tigom kauban ang iyang economic team sa Malacañang.
Gimandoan usab sa Presidente ang tanang mga ahensya nga magsumite kaniya og report matag duha ka semana. Kini aron personal niyang makita ang dagan o progreso sa mga proyekto ug masiguro nga kini nagpadayon, nabuhat og tarong, ug mahuman sa saktong panahon.
Dugang pa ni Castro, magtukod og mekanismo ang Palasyo kon unsaon pagbantay ug pag-verify aron masigurong tinuod ug husto ang mga report nga isumite sa matag ahensya sa gobyerno.