Gimanduan ni Pangulong Ferdinand R. Marcos Jr. ang mga ahensya sa gobyerno nga buhaton ang tanang lakang aron masiguro ang luwas, tukma, ug hapsay nga pagpauli sa kapin 200 ka Pilipinong gustong mopauli sa Pilipinas taliwala sa tensyon tali sa Israel ug Iran.
Gisiguro sa Pangulo nga adunay ayuda nga andam alang sa mga mopauli, lakip ang ₱150,000 nga pinansyal nga tabang, temporaryong kapuy-an, transportasyon, ug suporta sa panginabuhian nga adunay training vouchers aron makatabang kanila sa pagsugod pag-usab.Gipangulohan ni Migrant Workers Secretary Hans Cacdac sa Department of Migrant Workers (DMW) ang pagdawat sa unang batch sa mga repatriates sa Amman, Jordan, diin 26 ka Pilipino ang unang nakaabot gikan sa Israel pinaagi sa King Hussein Crossing.
Nagpabilin ang aktibong koordinasyon ug pagproseso sa mga hangyo alang sa repatriation nga nadawat gikan sa mga Pilipino sa Israel ug Iran. Gipahimangnoan ang mga Pilipino nga makig-alayon sa mga embahada sa Tel Aviv ug Tehran ug mosunod sa ilang mga giya aron mahatagan dayon og tabang.Sa Israel, gihatagan na og food packs ug pinansyal nga tabang ang mga Pilipino.
Daghan kanila ang nagpabilin sa hostel sa opisina sa migrant workers diin adunay dugang nga lugar kung kinahanglan pa. Ang gobyerno nagpadayon sa pagbuhat aron maprotektahan ang kaluwasan ug kahimtang sa tanang Pilipino.