Hingpit ang pagkadismaya sa mga pamilya sa mga biktima sa war on drugs human wala motambong si kanhing Presidente Rodrigo Duterte sa confirmation of charges hearing sa International Criminal Court (ICC) niadtong Lunes.
Matud ni Atty. Joel Butuyan, abogado sa mga biktima, nga importante kaayo ang pag-atubang sa korte sa kanhing pangulo isip bahin sa hustisya sa mga reklamo sa crimes against humanity nga gisang-at batok kaniya.
Subay niini, miapela ang abogado sa tribunal nga dili ibasura ang kaso gumikan kini na lang ang nabilin nga paagi sa mga biktima human giangkon sa gobyerno sa Pilipinas nga lisod ipatuman ang kaso sa lokal nga sistema.
Wala mitambong si Duterte sa pagdungog tungod sa iyang pagbarug nga wala niya giila ang hurisdiksyon sa ICC.