Nakatala og world record ang 21-anyos nga si Saul Hafting gikan sa Annapolis Royal, Nova Scotia, Canada human siya makasulbad og 211 ka Rubik’s Cube samtang nag-bounce gamit ang pogo stick.
Gisulayan ni Hafting niadtong 2021 ang paghimo sa rekord alang sa pinakadaghan nga rotating puzzle cubes nga nasulbad samtang nagsakay og pogo stick.
Gi-aprobahan ang iyang rekord niadtong 2022, diin iyang nalupig ang kanhing rekord nga 65 ka Rubik’s Cube.
Nakadawat usab siya og sertipiko ug gipakita ang iyang rekord sa website sa Guinness World Records.
Bisan pa niini, wala dayon maapil ang iyang rekord sa tinuig nga libro sa organisasyon hangtod nga nakadawat siya og email gikan sa mga opisyal sayo ning tuiga nga ipakita na kini sa Guinness World Records 2027.
Gipadayag usab ni Hafting ang iyang excitement nga makapalit na siya sa kaugalingong kopya sa libro ug makita ang iyang ngalan niini.