Gikabalak-an sa pipila ka legal nga eksperto ang gitugyan nga komitiba kang Senador Robin Padilla sa Senate Committee on Constitutional Amendments.
Sa pakighinabi sa Bombo Radyo Malaybalay, kang Atty. Proculo Sarmen, legal counsel sa Federation of Free Workers, gipasabot niini nga bisan kwalipikado si Padilla isip Senador, apan mas angay matud pa nga ibutang ang Senador sa komitibang mas duol sa iyang mga kasinatian.
Matud ni Atty. Sarmen, bug-at ang responsibilidad sa Constitutional Amendments Committee, ug kinahanglan kini nga adunay lawom nga law background ang muhawid niini aron masabtan ug matuki pag-ayo ang mga legal ug teknikal nga aspeto sa Konstitusyon.
Dugang pa ni Atty. Sarmen, nga lisod alang sa usa ka non-lawyer nga mosabot ug mo-navigate sa mga komplikado nga proseso kung wala kini pormal nga hinanawan sa mga balaod.Â
Bisan pa man niana, giklaro sa abogado nga wala niini gikaminusan ang kapasidad ni Senador Padilla isip Senador, apan gitinguha nga mas mahatagan og katungdanan nga angayan ug tukma sa kahibalo sa usa ka miyembro sa Senado.