Gideklara sa usa ka experto nga dili makatarunganon ug ilegal ang pagtugyan kang kanhi Presidente Rodrigo Duterte ngadto sa International Criminal Court (ICC) gumikan wala kini miagi sa mga korte sa Pilipinas.
Sa eksclusibong pakighinabi sa Bombo Radyo kay Atty. Proculo Sarmen nga isip usa ka abogado, angay lamang nga desisyonan sa Korte Suprema kon husto ba ang pag-surrender sa usa ka Pilipino sa Hague, ilabi na nga angay kining moagi sa domestic courts.
Nag hatag usab og pahimangno si Atty. Sarmen sa administrasyon ni Presidente Ferdinand Marcos Jr. nga ang lakang sa pag-kooperar sa Interpol alang sa pagdakop kang Kanhi Pres. Duterte nagresulta sa dakong pagsupak gikan sa mga Filipino.
Dugang pa niini, angay timbang-timbangon og maayo sa gobyerno ang ilang desisyon aron malikayan ang “abuse of discretion” ug masiguro nga nasunod ang saktong proseso ubos sa balaod sa nasud.