Posibleng hinungdan sa pagbasura sa iyang Temporary Restraining Order (TRO) ang maong pagtago-tago ni Senador Ronald “Bato” Dela Rosa human mibalibad ang Korte Suprema nga hatagan kini og proteksyon batok sa warrant of arrest gikan sa International Criminal Court (ICC).
Sa eksklusibong pakighinabi sa Bombo Radyo Malaybalay, gipatin-aw sa legal expert ug propesor sa balaod nga si Atty. Oscar S. Moreno nga dako og epekto sa desisyon sa korte ang paglikay sa senador sa hurisdiksyon sa gobyerno, tungod kay lisod ihatag ang dinalian nga proteksyon sa balaod ngadto sa tawo nga wala nagpakita og respeto niini. Gipasabot ni Moreno nga bisan wala pa’y pinal nga desisyon sa merito sa kaso, ang pagka-deny sa TRO nagpasabot nga legally pwede nang molihok ang mga otoridad bisan walay local court order.
Dugang pa sa propesor, ang bola naa na karon sa kamot sa executive branch pinaagi sa DOJ ug PNP, apan nagpabilin karon nga dakong pangutana kon aduna ba’y igong kaikag ug determinasyon ang administrasyon ni Presidente Marcos sa pagserbi sa maong warrant batok sa mambabalaod.