Nasikop sa kapulisan ang usa ka 15-anyos nga menor de edad human kini gireklamo sa pagpangawat og usa ka botelyang perfume sulod sa usa ka convenience store sa Purok Sais (6), Barangay Poblacion, Damulog niadtong Mayo 20 sa alas-singko sa hapon.
Base sa kapolisan, dinalian nga miduol sa nagpatrolyang mga sakop sa Damulog Municipal Police Station ang empleyado sa maong tindahan ug mitaho nga gitago sa batan-on ang usa ka body spray perfume nga nagkantidad og P179 sulod sa iyang pantalon sa wala pa kini mogawas sa establisemento nga walay bayad.
Dihang gisusi sa mga otoridad uban sa Women and Children Protection Desk (WCPD) ug MSWDO, nakaplagan sa posesyon sa menor de edad ang maong produkto. Nadiskubrehan usab nga nipalit pa kini og pipila ka snacks ug ilimnon aron dili pagdudahan samtang gihimo ang pagpanglingla.
Sa pagkakaron, luwas nga gi-turn over ang maong menor de edad ngadto sa kustodiya sa MSWDO ug DSWD-Damulog alang sa saktong intervention, samtang naibalik na ngadto sa management sa tindahan ang narekober nga ebidensya.