Gikabalak-an sa personahe sa Bureau of Fire and Protection kon BFP ang negatibong epektong hatud sa pagmahal sa presyo sa produktong petrolyo sa umaabot nga mga adlaw kay posibleng magpondo ang katawhan ug petrolyo diha sa ilang mga panimalay.
Sa pakighinabi sa Bombo Radyo Malaybalay kang FO2 Romeo Von Deleonio, Building Plan Evaluator sa BFP Malaybalay, ginadili ang pagpondo og produktong petrolyo ma diesel, gasolina o kerosene nga sobra sa 45 litros sa usa ka balay. Kini tungod kay delikado ug mahimong hinungdan sa sunog kung walay saktong fire safety measures.
Gibutyag usab nga bawal ang pag-transfer sa daghang flammable ug combustible liquid sama sa gasolina kung walay klarong clearance gikan sa BFP. Gikinahanglan nga ang maong mga produkto ibutang lamang sa mga approved containers ug sa lugar nga luwas ug layo sa posibleng ignition source.
Dugang pa niini kung aduna man gani’y dagkong pondo sa produktong petrolyo nga ipondo alang sa negosyo o industrial use, kinahanglan kining ipaubos sa inspeksyon sa BFP ug kuhaan og Fire Safety Clearance aron masiguro ang kahimtang sa seguridad. Gipahimangnoan sa BFP ang publiko nga magmatngon ug musunod sa mga regulasyon aron malikayan ang disgrasya nga mahimong resulta sa pagsupak sa mga balaod sa fire safety.
Asoy pa ni Deleonio nga ang masakpang nagpondo ug sobra sa 45 litros sulod sa balay nga walay clearance gikan sa Bureau of Fire Protection (BFP) posibleng pagmultahon og gikan ₱37,500 hangtod ₱50,500 base sa balaod. Giklaro sa opisyal nga ang gasolina , delikadong likido, dali mudakop og kalayo ug pwede makaresulta sa sunog. Nasayrang base sa pagbanabana sa Department Energy of Energy-Oil Industry Management Bureau ang diesel ug kerosene posibling musaka labaw sa 4 pesos samtang gasolina 3 pesos.