Wala pa’y natala nga dautang insidente sukad nagsugod ang dungan nga selebrasyon sa Semana Santa ug ang nagpadayong Kaamulan Festival sa Bukidnon. Kini ang gikumpirma ni Police Colonel Oliver Sotto Navales, Provincial Director sa Bukidnon Police Provincial Office (BPPO).
Gibutyag ni Navales nga resulta kini sa gipakusgan nga security deployment, diin gidoble ang presensya sa mga personahe ilabina sa Kaamulan grounds ug Bukidnon Provincial Capitol nga dinagsaan sa mga deboto ug mga turista. Dugang niya, adunay mga augmentation personnel gikan sa Regional Office aron maseguro nga mabantayan ang tanang dapit nga dagsangon sa katawhan.
Gipahibalo usab sa opisyal nga igo ug kompleto ang security forces nga gi-deploy sa maong mga dapit. Kini naglakip sa kapulisan, mga volunteer civil organizations, BPATs, barangay officials, ug mga sundalo nga nagtinabangay isip partners sa pagmintinar sa kalinaw ug kahapsay (peace and order) sa tibuok selebrasyon.
Gipasalamatan ni Navales ang kooperasyon sa katawhan sa Bukidnon nga misunod sa mga pahimangno sa seguridad, ilabina sa pagbantay sa ilang mga kabataan aron malikayan ang pagkabuwag taliwala sa bagat sa mga tawo nga nagtambong sa misa ug nagsuroy sa Kaamulan Park.
Samtang nagpadayon ang mga kalihokan, gihangyo sa kapulisan ang publiko nga likayan ang pagsul-ob og mahalon nga alahas ug sigurohong pirming mabantayan ang ilang mga kauban, labi na ang mga bata, aron mapadayon ang malinawon ug luwas nga pagsaulog sa Semana Santa ug Kaamulan 2026 sa tibuok probinsya.