Gikatakdang magpulong karong Abril 27 ang high-level coordinating team sa administrasyong Marcos uban sa ilang counterparts sa Czech Republic aron tukion ang kasamtangang kahimtang ug lokasyon ni Zaldy Co, ug unsaon siya dali nga mapabalik sa Pilipinas.
Sumala sa mga opisyal, limitado pa sa karon ang impormasyong ilang nakuha tungod sa pagrespeto sa mga balaod sa Czech Republic, lakip na ang hugot nga General Data Protection Regulation nga nagpanalipod sa personal nga datos.
Tungod niini, sumala ni Acting Justice Secretary Frederick Vida nga andam sila sa posibilidad nga dili dayon mauli si Co kung dili kini tugotan sa legal nga proseso.
Bisan pa niini, nagpabilin nga determinado ang gobyerno sa pagpadayon sa diplomatikong paningkamot pinaagi sa paggamit sa mga kasabutan sama sa United Nations Convention Against Corruption aron mapalig-on ang kooperasyon batok sa korapsyon.
Gilauman usab ang pakigtagbo sa Department of Justice ug Philippine Center on Transnational Crime sa Interpol sa Czech Republic, samtang padayon ang pag-aplikar sa Red Notice nga makatabang sa pagdakop kang Co bisan pa og mosulay kini og political asylum o bisan pa anaa kini lahing lugar sa Europe.
Gisaad ni Vida nga maghatag siya og update human sa maong miting kabahin sa kahimtangan ug sunod nga lakang sa gobyerno sa pagkuha balik kang Co.