Gigahinan og P2.9 bilyon nga budget ni Senador Sherwin Gatchalian ang school-based mental health program. Lakip niini nga pondo ang pagtukod sa Learner Wellness Division ubos sa Bureau of Learner Support Services.
Kini nga alokasyon kabahin sa Republic Act 12080 o ang Basic Education Mental Health and Wellbeing Promotion Act .
Tumong sa maong balaod nga palig-onon ang mga programa sa mental health sa mga tunghaan aron matubag ang panginahanglanon sa mga estudyante, lakip na ang paglikay sa mga kaso sa suicide ug uban pang problema sa kahimsog sa pangisip sa mga kabatan-onan.
Matud pa ni Gatchalian, mahinungdanon kini nga bahin sa pondo sa edukasyon aron mahatagan og pagtagad ang kaayohan ug mental health sa mga magtutungha. Ang Learner Wellness Division mao ang magtakda sa target nga tuig sa pagpatuman niini, apil na ang pagtukod og mga mental health offices ug care centers sulod sa mga tunghaan.