Hugot na karong gipangandaman sa Bukidnon Police Provincial Office (BUKPPO) ang seguridad alang sa umaabot nga Northern Mindanao Regional Athletic Association (NMRAA) 2026 nga ipahigayon sa dakbayan sa Malaybalay.
Sa ekksklusibong pakighinabi sa Bombo Radyo Malayabalay kang PCPT. Sheila Joy P. Jangad, ang tigpamaba sa Bukidnon Police Provincial Office, kasamtangan na silang naghimo og mga deployment plans aron masiguro ang hapsay ug malinawon nga dagan sa maong dakong kalihokan sa paugnat sa kusog.
Gipahayag ni Jangad nga gawas sa lokal nga pwersa, nagplano usab sila og augmentation o pagdugang sa mga personnel aron masiguro nga matag kanto ug dapit diin ipahigayon ang mga dula duna’y igong presensya sa kapulisan.
Dugang pa sa opisyal, lauman usab nga mudagsa ang liboan ka mga partisepante gikan sa nagkadaiyang lugar sa Rehiyon nga mosalmot sa umaabot nga kalihokan.
Tungod niini, doble karon ang pagpangandam nga gihimo sa Bukidnon Police Provincial Office aron masiguro ang kahapsay ug kaluwasan sa tanan.
Gipaambit usab niini nga hingpit usab ang pagpangandam sa mga otoridad aron masiguro ang lig-on nga partisipasyon sa mga atleta lakip na ang kaluwasan niini ug sa tanang dumuduong.