Gipahigayon karon sa Malaybalay City Police Station ang usa ka lapad nga hot pursuit operation batok sa suspetsado sa brutal nga paglugos ug pagpatay sa usa ka nuwebe anyos nga batang babaye sa Sitio Encalbog, Barangay Can-ayan.
Matod pa ni PLTCOL Joepet Paglinawan, ang Chief of Police sa Malaybalay CPS, gibutyag niini nga duna na silay gi-monitor nga suspetsado kinsa gina-verify karon ang presensya sa dapit sa Lantapan. Matud ni Paglinawan, duna nay mga circumstantial evidence nga nagtudlo sa maong indibidwal, lakip ang testimonya sa saksi nga nakakita kaniya nga nisunod sa biktima ug ang narekober nga sako nga nag-match sa iyang pinuy-anan.
Gipaabot usab ang resulta sa autopsy sa patay’ng lawas sa biktima aron matino ang eksaktong hinungdan sa kamatayon ug alang sa pormal nga pagpasaka og kaso karong Martes o Miyerkules. Nasuta nga ang maong suspetsado duna nay daang rekord sa balaod lakip ang kasong carnapping niadtong 2019 ug kasong murder kaniadto sa Lantapan.
Samtang nagpadayon ang operasyon, nagpabilin ang P50,000 nga ganti gikan kang City Councilor Jason Chad Ayala alang sa bisan kinsa nga makahatag og impormasyon sa dinaliang pagdakop sa suspetsado, samtang ang pamilya sa biktima nagpadayon sa ilang panawagan nga motahan na ang nahisgutan ngadto sa mga otoridad.