Nakumpiska gikan sa usa ka 50-anyos nga lalaki ang usa ka yunit sa Armscor 9mm pistol human kini sikopa sa mga otoridad tungod sa ilegal nga pagpabuto og armas didto sa Kibawe, Bukidnon niadtong Abril 19, 2026, mga alas 8:50 sa gabii.
Sumala sa report ni Oliver Sotto Navales ngadto kang Christopher Nortez Abrahano, ang mga personahe sa Kibawe MPS nga gipangunahan ni Leonila R. Vicente ang dali nga miresponde sa dapit aron magpahigayon og imbestigasyon.
Sa inisyal nga imbestigasyon, nasayran nga ang suspek nag-inom uban sa iyang silingan ug sa dihang nahubog, kalit kining nag-amok ug ilegal nga gipabuto ang iyang dala nga armas.
Malampusong narekober sa mga pulis ang usa ka yunit sa Armscor 9mm pistol ug lima ka buhing bala gikan sa suspek.
Gipahibalo usab kini sa iyang mga katungod o Constitutional Rights gamit ang pinulongan nga iyang nasabtan, ug sa pagkakaron, anaa na siya sa kustodiya sa Kibawe MPS uban sa mga ebidensya alang sa hustong disposisyon.
Giandam na usab ang ballistic examination ug paraffin test nga isumite sa Provincial Forensic Unit sa Malaybalay City, lakip ang firearm record verification ngadto sa Regional Civil Security Unit sa Camp Alagar, Cagayan de Oro City.
Gawas sa illegal discharge of firearm, giatubang usab sa suspek ang kasong pagsupak sa Republic Act 10591.