Gipasalig karon sa National Grid Corporation of the Philippines (NGCP) nga magpabiling igo ug stabli ang suplay sa kuryente sa tibuok Mindanao luyo sa nasinating serye sa pag-ulan ug hulga sa dautan sa panahon.
Matud sa NGCP, duna pa’y dakong operating margin nga 510 megawatts ang Mindanao Grid karong adlawa, Hunyo 25. Kini human natala ang kapin 3,100 megawatts nga available capacity kumpara sa kapin 2,600 megawatts lang nga gilaumang peak demand sa tibuok rehiyon.
Sa pakighinabi sa Bombo Radyo Malaybalay kang Mae Roselle Curiano, ang tigpamaba sa NGCP, gibutyag niini nga mikunhod usab ang ilang transmission charges karong bulana nga nagpasabot og mas ubos nga bayranan alang sa mga konsumidor. Gitapos ni Curiano nga naka-deploy ug standby na ang ilang mga line crew ug inhenyero ubos sa ilang Integrated Disaster Action Plan aron daling moresponde ug mosiguro nga dinalian ang pag-ayo sa mga linya sa kuryente kon duna’y maigo sa kalamidad.