Giklaro ni Israeli Prime Minister Benjamin Netanyahu nga dili mohunong ang ilang operasyon militar batok sa grupong Hezbollah sa Lebanon, luyo sa bag-ohay lang nga anunsyo sa “temporary ceasefire” tali sa Israel ug Iran.
Matud ni Netanyahu, ang maong ceasefire deal nga gipatuman alang sa gubat sa Iran wala nagpasabot nga moundang na usab sila sa pag-atake sa Lebanon. Gipasiugdahan sa Prime Minister nga magpadayon ang Israel sa ilang tumong nga pulpogon ang hulga sa Hezbollah aron maseguro ang seguridad sa ilang nasud.
Sa iyang pamahayag, giingon ni Netanyahu nga “andam silang mobalik sa pakiggubat sa bisan unsang takna” kung gikinahanglan ug ang ilang “tudlo anaa kanunay sa gatilyo.”
Kini nga pamahayag miabut human ang Israel milusad sa giingong “pinakadako nga coordinated strike” sa tibuok Lebanon, diin kapin sa 100 ka mga dapit sa Hezbollah ang dungan nga gibombahan, lakip na ang mga target sa Beirut, Bekaa Valley, ug habagatang bahin sa nasud.
Samtang gilauman sa kadaghanan nga ang ceasefire sa Iran magdala og kahilom sa tibuok rehiyon, giklaro sa Malacañang sa Israel ug sa White House nga ang maong sabot wala naglakip sa gubat didto sa Lebanon.