Gihangop sa Motorela Federation sa Malaybalay City ang gikatakdang ₱4 nga rollback sa presyo sa gasolina karong adlawa, dungan sa paghatag og katin-awan kalabot sa gipatuman nga “pakyaw system” sa pletehan matag gabii.
Sa pakighinabi sa Bombo Radyo Malaybalay ngadto kang Marlon A. Igpit, ang presidente sa maong federasyon sa motorela sa Malabalay, na matod pa niini nga dako ang mahatag nga kahupayan sa kapin 700 ka mga drivers ang pag-ubos sa presyo sa lana. Gikan sa kasamtangang ₱96, gilauman nga mokanaog kini sa ₱92 matag litro, butang nga makapamenos sa adlaw-adlaw nga galastuson sa mga operatiba sa kapin 600 ka units sa dakbayan.
Dungan niini, gitubag usab ni Igpit ang mga mulo sa mga pasahero kabahin sa giingong mahal nga pletehan kon moabot na ang kagabinon. Gipatin-aw sa opisyal nga ang pakyaw system sugod alas-8 sa gabii legal ug nakalatid sa opisyal nga fare matrix sa siyudad.
bos sa maong sistema, ang plete gikan sa Poblacion paingon sa laing bahin sa Poblacion mokantidad og ₱72, samtang ₱90 usab kon paingon sa dapit sa Landing. Apan aron dili mabug-atan ang publiko, gipasabot ni Igpit nga duna’y pagsinabtanay ang mga drivers nga maningil lamang og ₱20 matag pasahero kon duna’y daghang mosakay aron mabahin ang kinatibuk-ang bayranan sa pakyaw.
Nanawagan karon ang federasyon sa mga drivers nga hatagan og tarong nga katin-awan ang mga pasahero kabahin sa basehan sa pletehan aron malikayan ang panagbangi. Nangayo usab og pasaylo si Igpit sa publiko sa mga higayon nga duna’y mga drivers nga napakyas sa paghatag og hustong eksplanasyon kalabot sa legal nga sistema sa pletehan sa dakbayan.