Gibutyag ni Sen. Risa Hontiveros nga adunay nagpadayong mga paghisgot ug posibleng kalihukan sulod sa Senado may kalabotan sa liderato, apan giklaro niini nga ang 11 ka senador sa minority bloc nagpabilin nga lig-on ug wala pa makabuo og dugang nga suporta para sa bag-ong setup.
Matud ni Hontiveros, ang ilang grupo nakatutok sa pagpalig-on sa trabaho sa Senado diin lakip na ang pagpasar og mga balaod, budget deliberations, ug pag-andam sa impeachment trial batok kang Vice President Sara Duterte.
Giila usab niini nga anaa sa “pinakalisod nga sitwasyon” ang Senado tungod sa sunod-sunod nga kontrobersiya.
Gipasiugda ni Hontiveros nga importante ang independente nga imbestigasyon sa insidente sa pagpabuto og pusil sulod sa Senado, ug posible nga magsugod usab sila og kaugalingong inquiry aron mas mapaniguro ang tinuod nga nahitabo ug kung kinsa ang responsable.
Gipunting usab niini nga ang tanan nga senador adunay kolektibong responsibilidad sa pagpanalipod sa kredibilidad sa institusyon, ug kung adunay kausaban sa liderato, mas angayan si Sen. Sherwin Gatchalian base sa iyang kasinatian ug track record.
Sa katapusan, gipanghimakak niya ang alegasyon nga ang Malacañang nagapanghilabot sa desisyon sa Senado, ug giingon nga ang Senado mismo ang angay magdesisyon sa kaugalingon.