Gipanghimakak sa Malacañang Palace ang alegasyon ni Senadora Imee Marcos nga adunay giingong pamugos ug pagpanghulga batok sa mga mambabalaod aron suportahan ang impeachment complaint kontra kang Bise Presidente Sara Duterte.
Matud ni Palace Press Officer Claire Castro, walay klarong basehan ang maong mga akusasyon kung wala kini’y gipakita nga ebidensya.
Sumala ni Castro nga mas motuo ang publiko kung ang mga pasangil dunay kalakip nga pruweba, dili lang puro pamahayag o alegasyon.
Dugang pa sa Malacañang nga daw naanad na ang pipila ka personalidad sa pagpagawas og mga espekulasyon ug intriga imbes nga konkretong ebidensya.
Gitumong usab niini si kanhing Presidente Rodrigo Duterte kalabot sa maong pamahayag.
Nauna niini, mipahayag si Senadora Imee Marcos nga adunay mga kongresista ug senador nga giingong gina-pressure o gina-panghulga aron suportahan ang impeachment complaint batok kang Vice President Sara Duterte.
Sumala sa senadora, adunay mga mambabalaod nga giingong gihulga og kaso nga ipasaka sa Office of the Ombudsman, samtang gigamit usab ang pipila ka ahensya sama sa Department of Justice (DOJ), National Bureau of Investigation (NBI), ug Securities and Exchange Commission (SEC) aron pugson ang dili pabor sa impeachment.
Gidugang pa niini nga adunay mga pondo sa pipila ka mambabalaod nga giingong na-delay tungod sa “for later release” o FLR, nga nakaapekto sa ilang mga proyekto sa distrito.
Apan wala magtudlo og pangalan si Senadora Marcos kung kinsa ang mga opisyal nga giingong na-pressure.
Sa karon, gilauman nga pagbotohan sa House of Representatives of the Philippines ang Articles of Impeachment batok kang Duterte, diin kinahanglan ang dili moubos sa 106 boto aron mapadala kini sa Senado para sa impeachment trial.