Gilauman nga tutukan sa House of Representatives karong Lunes ang impeachment case batok kang Bise Presidente Sara Duterte, lakip na ang sponsorship, interpellation, ug botohan sa committee report ug Articles of Impeachment.
Sumala kang Manila Rep. Joel Chua, ang impeachment proceedings mahimong usa sa pinaka-prayoridad nga agenda sa plenaryo.
Nauna nang giaprubahan sa House Committee on Justice ang mga reklamo batok sa bise presidente pinaagi sa boto nga 53-0 para sa probable cause, ug 55-0 usab alang sa committee report ug Articles of Impeachment.
Ubos sa 1987 Constitution, kinahanglan ang dili moubos sa 106 boto sa Kamara aron mapasa ang Articles of Impeachment ug mapadala sa Senado alang sa impeachment trial.
Matud ni Chua, kapin 200 ka kongresista na ang nagpadayag og suporta sa maong impeachment case. Dugang pa niini, nga misaka ang suporta human mahisgutan sa mga pagdungog ang mga isyu sama sa SALN, AMLC records, confidential funds, ug uban pang alegasyon batok sa bise presidente.
Ang impeachment complaint naglangkob og upat ka Articles of Impeachment, lakip ang giingong misuse sa confidential funds, unexplained wealth, bribery, ug grave threats. Dugang usab ni Chua nga nahatagan og kahigayunan ang kampo ni Vice President Sara Duterte sa pagpresentar sa ilang ebidensya, apan wala kini nahimo.
Kung maaprubahan sa Kamara, gilauman nga mapadala sa Senado ang Articles of Impeachment sulod sa maong semana.
Posible usab nga maaprubahan ang prosecution panel sa Kamara nga mahimong lakip ang pipila ka mambabalaod sama nila Representatives Gerville Luistro, Chel Diokno, Leila de Lima, Rodge Gutierrez, Keith Flores, ug Bel Zamora.