Patay ang usa ka magtiayon human gi-ambush ug gipusil-patay sa duha ka suspek sa Sitio Bahokanon, Barangay Cabadiangan, Kadingilan, Bukidnon kaganihang buntag, Agosto 15, 2026.
Giila ang mga biktima nga si Titing Panday ug ang iyang asawa, kinsa parehong nag-edad og 57 ug 60 anyos. Subay sa imbestigasyon sa Kadingilan Municipal Police Station (MPS), nagsakay og motorsiklo ang magtiayon pauli sa ilang panimalay aron magpakaon sa ilang mga hayop nang kalit silang giharang ug gipamusil sa mga suspek duol sa usa ka katubhan. Nakaangkon og mga samad pinusilan sa nagkadaiyang bahin sa lawas ang mga biktima nga nahimong hinungdan sa ilang dihadihang pagkabugto sa kinabuhi.
Sumala sa saksi sa dapit, dali nga misikad ang duha ka suspek (nag-edad og 40 ug 22 anyos) sakay sa usa ka itom nga Bajaj nga motorsiklo paingon sa Barangay Macabenban, Carmen, Cotabato matapos ang pambusil. Personal nga atraso ang gitan-aw nga motibo sa maong krimen, samtang nagpadayon ang hot pursuit operation sa kapulisan sa pakig-alayon sa Carmen MPS alang sa pagdakop sa mga suspek nga at-large pa gihapon.