Nasikop sa mga awtoridad ang usa ka 34-anyos nga giilang street-level drug target human nasakmitan og kapin ₱42,000 nga kantidad sa gituohang shabu sa gipahigayong joint buy-bust operation sa Purok 21, Barangay Poblacion, Valencia City niadtong Biyernes sa gabii, Agosto 14, 2026.
Giila ang suspek nga si alyas “Bry,” residente sa maong dapit. Sa operasyon nga gipahigayon sa Valencia City Police Station sa pakig-alayon sa PDEA-10 ug mga elemento sa Bukidnon Police Provincial Office (PPO), nakuha gikan sa posisyon sa suspek ang upat ka heat-sealed plastic sachets sa gituohang shabu nga nagtimbang og 6.2 gramo ug nagkantidad og ₱42,160, apil na ang ₱500 nga buy-bust money, cellphone, ug usa ka coin purse.
Sa kasamtangan, gitanggong na ang suspek sa Valencia CPS custodial facility ug nag-atubang og kasong paglapas sa Sections 5 ug 11 sa Republic Act 9165 (Comprehensive Dangerous Drugs Act of 2002). Ang mga nasakmit nga gidiling droga gidala na sa Bukidnon Provincial Forensic Unit alang sa pormal nga eksaminasyon.