Kumpirmado nga dili momenos sa 20 ka tawo ang namatay human miuyog ang usa ka kusog nga Magnitude 7.7 nga linog sa Flores Island sa sidlakang bahin sa Indonesia kagahapon sa buntag, Sabado, Agosto 15.
Sumala sa rescue official nga si Fathur Rhaman, gikan sa upat ka lungsod sa maong isla nga sikat sa mga turista ang mga biktima. Pipila kanila narekober gikan sa mga natumpag nga bilding duol sa dunggoanan sa Maumere, habang nagpadayon ang pagpaningkamot sa mga rescuer nga maluwas ang uban pang na-trap sa mga guho sa mga dapit sa Manggarai ug Nagekeo regency.
Gipatin-aw sa mga awtoridad nga nag-atubang og dakong hagit ang rescue operations tungod sa mga nalumpag nga karsada dala sa pagdahili sa yuta (landslide) ug sa padayong pag-igo sa dose-dosena nga mga aftershock. Ang Indonesia nagpabilin nga daling maigo sa mga kusog nga pag-uyog tungod sa lokasyon niini sa Pacific Ring of Fire.