Opisyal nga giila sa Guinness World Records ang kalampusan sa maghigala nga sila Sujoy Kumar Mitra ug Prateek Choraria human niini nabisitahan ang 42 ka libraries sa tibuok New Delhi sulod lamang sa usa ka adlaw.
Sumala sa taho, dili sayon ang maong hagit tungod kay naggahin ang duha og 60 ka adlaw sa pagplano ug pagproseso sa mga permit.
Dili parehas sa ubang records nga makasulod lamang pinaagi sa pagpalit og ticket, tgumikan, gikinahanglan nilang makig-coordinate sa mga librarian, magsumite og request letters, ug makakuha og security clearance aron opisyal nga matala ang ilang pagbisita.
Kini ang ikaduhang record attempt sa duha. Niadtong April 2025, misulay sila sa pagbisita og 61 ka library apan napakyas kini nga ma-verify tungod sa kakulang sa pagsunod sa istriktong official guidelines.
Si Mitra usa na ka iladong record holder ug biyahero nga nakabisita na sa tanang nasud nga miyembro sa United Nations, ug karon adunay 14 ka Guinness titles, lakip ang paspas nga pagbisita sa Seven Wonders of the World sulod sa lima ka adlaw.
Bisan pa sa kakapoy sa padayon nga pagdagan ug pagsakay sa pampublikong transportasyon sulod sa tibuok adlaw, determinado ang duha nga mahuman ang hagit.
Matud pa nila, dili lamang titulo ang ilang tumong kundili ang pagpahinumdom sa publiko sa kahinungdanon sa mga libro isip “knowledge bank” sa ilang siyudad.