Wala pa’y nadawat nga opisyal nga petisyon alang sa pagtaas sa pletehan sa mga pampublikong sakyanan ang Land Transportation Franchising and Regulatory Board (LTFRB) Region 10, taliwala sa padayong pagsaka sa presyo sa lana sa tibuok nasod. Sa pakighinabi sa Bombo Radyo Malaybalay, gipahayag ni LTFRB-10 Regional Director Alexes Joseph “Aljo” Bendijo nga padayon usab ang pag-apod-apod sa nahibiling fuel subsidy alang sa mga kwalipikadong operator. Gipasabot ni Bendijo nga nalangan lamang ang pagpagawas sa maong pondo tungod sa mga giya ug proseso sa nasyonal nga kagamhanan.
Dugang pa niini, gitugotan na sa LTFRB ang pagbiyahe sa mga bag-ong electric o “green taxis” sa Cagayan de Oro City subay sa Republic Act 11697 o EVIDA Law. Gipadayag usab sa opisyal nga bukas ang ilang buhatan sa pakig-alayon sa mga lokal nga kagamhanan aron sa paghatag usab og opisyal nga taxi franchise sa mga dakbayan sa Malaybalay ug Valencia.
Tungod niini, padayon nga gidasig sa LTFRB ang mga lokal nga transport operator sa Rehiyon 10 nga mopailalom sa re-fleeting ug gamiton ang mga electric vehicle aron makadepensa sa kalikopan ug makatabang sa modernisasyon sa pampublikong transportasyon.