Gisugdan na karon sa Office of the Ombudsman ang imbestigasyon batok sa ubang mga indibidwal nga nalambigit sa isyu sa korapsyon nga may kalabutan sa mga flood control projects.
Sumala ni Ombudsman Jesus Crispin “Boying” Remulla, lakip sa giimbestigahan ang mga “losing bidders” o mga kontratista nga napilde sa bidding sa mga proyekto.
Kini nagsubay human makigpulong ang Ombudsman sa mga opisyal sa Philippine Competition Commission kon (PCC) diin gikaingong maoy nagbutyag sa impormasyon nga lakip matud pa ang mga napildeng bidder sa nakapahimulos sa maanomaliya nga sistema.
Matud pa, adunay usa ka indibidwal nga kanunay kauban sa mga losing bidders nga gatumbok sa komisyon.
Gipasabot ni Remulla nga ang mga napildeng bidder makadawat og 3% gikan sa tibuok kantidad sa proyekto diin nahimo na nga usa ka kultura ug dugay nang naglungtad sa Department of Public Works and Highways kon (DPWH).
Pananglitan, anaa P100 milyon ang kantidad sa proyekto, P3 milyon niini ang ginabahín-bahín sa mga losing bidders.
Dugang pa, iyang gibutyag usab sa ombudsman nga dili lang ang mga opisyal ang nakapahimulos sa pondo sa proyekto, kondili lakip na ang ubang staff hangtod sa mga janitor.
“Everybody happy diha, hangtod janitor naa,” matud pa ni Remulla. Bisan pa niana, gi-awhag niini ang bisan kinsang nalambigit sa mga losing bidders nga moadto sa iyang buhatan ug magsulti sa tinuod aron matabangan sa nagpadayon nga imbestigasyon sa anomaliya sa flood control projects.