Gipadayag karon sa usa ka lider-Lumad ang iyang hilabihang kaguol ug kasakit sa kasingkasing tungod sa mga kausaban sa selebrasyon sa Kaamulan Festival 2026 nga giingong wala na nagsubay sa ilang sagradong tradisyon.
Sa pakighinabi sa Bombo Radyo Malaybalay, gibutyag ni Bae Mamatbat, ang Indigenous People Mandatory Representative (IPMR), nga dako ang iyang pagsupak sa paggamit sa ilang mga balaang accessories ngadto sa mga litson nga baboy sa milabayng aktibidad. Matud ni Bae Mamatbat, usa kini ka dakong insulto sa ilang pagtuo tungod kay ang maong mga kabilin adunay lawom nga kahulugan ug kinahanglan pa kining agi-on sa ritwal sa mga Datu ug Bae sa dili pa gamiton.
Dugang pa sa maong lider, kaniadto maugdang ug malinawon ang Kaamulan nga walay indigay, apan sa pagkakaron nidaghan ang mga aktibidad nga nakasupak na sa ilang kultura ug posible pang makasuko sa kinaiyahan ug kang Magbabaya.
Bisan pa man sa maong mulo, gipili na lamang sa ilang sektor ang pagrespeto ug pagpasabot sa publiko, apan nagpabilin ang ilang hugot nga panawagan ngadto sa mga otoridad nga panalipdan ang tinuod nga diwa sa kultura sa pito ka tribo sa Bukidnon aron malikayan ang pagyatam-yatam sa ilang sagradong kabilin.