Wala pay plano ang nasod sa Iran nga magpadala og mga representante o negotiating delegation ngadto sa Pakistan samtang nagpadayon pa ang naval blockade sa Strait of Hormuz.
Sumala sa taho sa Tasnim News Agency, dili na moapil ang Tehran sa mga sabot-sabot alang sa usa ka ceasefire didto sa Islamabad kung dili pa kuhaon ang maong blockade.
Sa pikas bahin, gipahibawo ni U.S. President Donald Trump nga moabot sa Pakistan karong Lunes ang mga representante sa Amerika aron ipadayon ang panag-istorya uban sa Iran, bisan og wala pa gikumpirma sa White House kung kinsa nga mga opisyal ang moapil.
Giakusahan usab ni Trump ang Iran nga nilapas sa ceasefire agreement human kini giingong nagpabuto og bala sa Strait of Hormuz niadtong Sabado. Mibahad ang presidente sa Amerika nga mahimong targeton sa Estados Unidos ang mga imprastraktura sa Iran, sama sa mga power plant ug mga tulay, kung dili sila mosugot sa gitanyag nga kasunduan.
“Kon dili sila mosugot, gub-on sa Estados Unidos ang matag power plant ug matag tulay sa Iran,” matod pa ni Trump sa iyang social media post.