Nanawagan karon si Bae Mamatbat, ang Indigenous People Mandatory Representative (IPMR) sa Bukidnon, nga pagasusihon og maayo ang mga aktibidad sa Kaamulan Festival aron malikayan ang kasamok ug paglapas sa kultura sa pito ka tribo.
Sa pakighinabi sa Bombo Radyo Malaybalay, gipadayag ni Bae Mamatbat nga kinahanglan ang saktong pagsusi sa matag kalihokan tungod kay ang pito ka tribo adunay nagkalain-laing kinaiya ug pamatasan nga dili angay iparehas sa usa lang ka pamaagi. Gipunto sa maong lider ang kakuwang sa klarong representasyon sa matag tribo nga maoy hinungdan nga usahay mabalewala ang ilang tinuod nga identidad.
Hugot usab nga gisupak ni Mamatbat ang mga kompetisyon nga posibleng magpahinabo og panaglalis ug pagkabahin-bahin sa mga Lumad. Matud niya, ang tinuod nga diwa sa Kaamulan mao ang paghiusa ug pagrespeto sa mga sagradong ritwal, dili ang paghimo og mga aktibidad nga makapasuko sa kinaiyahan ug kang Magbabaya.
Subay niini, giawhag ni Bae Mamatbat ang lokal nga panggamhanan sa Bukidnon nga lingkoran ang maong isyu kauban ang mga Datu ug sektor sa turismo. Tumong niini nga maplano pag-ayo ang umaabot nga mga selebrasyon diin prayoridad ang pagpanalipod sa kabilin ug pagpahiuli sa tinuod nga diwa sa panaghiusa sa pito ka tribo sa lalawigan.