Gipakusgan sa Indonesia ang operasyon batok sa nagkalapad nga mga sunog sa kabukiran ug kalasangan sa Borneo ug Sumatra, diin liboan ka personahe ug dose-dosenang eroplano ang gigamit aron mapugngan ang pagkaylap sa kalayo.
Sumala sa gobyerno, 64 ka eroplano ang giandam alang sa aerial water-bombing operations, samtang mikabat sa 54,000 ka personahe ang nalambigit sa pagdumala sa sunog.
Ang aso gikan sa mga sunog mikatag ngadto sa pipila ka bahin sa East Malaysia ug Singapore.
Matud ni Cabinet Secretary Teddy Indra Wijaya, usa sa dagkong problema sa operasyon mao ang lapad nga lugar nga kinahanglang maabot sa mga responder, lakip ang lisod nga kahimtang sa mga peatland diin dali molalom ug magpadayon ang kalayo.
Gipatin-aw usab ni Daniel Sinyor, tigpamaba sa West Kalimantan disaster mitigation agency, nga mas komplikado ang pagpalong sa mga sunog tungod sa giladmon sa kalayo ilawom sa peatlands ug kakulang sa tinubdan sa tubig sa pipila ka apektadong lugar.
Samtang nagpadayon ang krisis, pipila ka grupo sa lumad ug civil society ang misang-at og class-action lawsuit batok sa gobyerno, lakip ang presidente ug gobernador, tungod sa giingong kapakyasan sa pagpugong sa balik-balik nga mga sunog matag tuig.
Misalmot usab ang Japan sa pagtabang human miabot sa West Kalimantan ang hapit 350 ka miyembro sa ilang Self-Defense Forces. Gipahayag usab ni Indonesian President Prabowo Subianto nga andam ang nasod sa pagdawat og tabang gikan sa Malaysia.
Gipasanginlan sa mga awtoridad ug eksperto ang grabeng kainit ug uga nga panahon, nga gipasamot sa kusog nga El Niño, pagbag-o sa klima ug mga pamaagi sa pagpanglimpyo sa yuta pinaagi sa pagpamutol ug pagsunog, isip pipila sa mga hinungdan sa pagsamot sa mga sunog.