Gilauman sa mga legal experts nga adunay dakong kausaban sa Konstitusyon sa dili pa muabot ang 2028 election ug sa gobyerno sa tuig 2026 nga posibleng mahimo ang pag-ilis sa mambabalaod ug sa kagamhanan.
Sa pakighinabi sa Bombo Radyo Malaybalay kang Atty. Tony Laviña, usa ka legal expert, mipadayag kini nga daghan ang mahimong malakip sa eskandalo ug kinahanglan tapuson ni Presidente Ferdinand Marcos Jr. ang iyang gisugdan.
Apan gipalandong ni Atty. Laviña, nga mas labing importante ang tinuod nga pagbag-o sa kultura sa politika ug sa dagan sa gobyerno.
Lakip sa gisugyot sa Abogado, nga kinahanglang ipatuman mao ang balaod batok sa political dynasty, balaod batok sa conflict of interest, ug ang pagrepaso sa party-list system.
Matud pa niini, mas pabor kini alang sa mga protesta ug rally isip lehitimong pamaagi sa demokrasya.
Diin gidayeg usab ni Laviña, ang kalihukan sa katawhan pinaagi sa mga protesta, nga nagpakita sa matud pa sa panginahanglan sa systemic change, radical change, ug bisan man revolutionary change.
Dugang pa niini, iyang gisugyot nga ang Independent Commission on Investigation (ICI) magpatuman sa transparent nga proseso pinaagi sa pagdokumento ug pag-video sa tanang pamaagi aron malikayan ang pagsupak sa katawhan tungod sa kakulang sa transparency.