Nagtingkagol na sa selda sa kapulisan ang usa ka 18-anyos nga dalaga human kini masakpan in flagrante delicto nga nagbaligya sa kawat nga laptop niadtong Abril 13, 2026, pasado alas 3:45 sa hapon.
Sa report nga gipadala ni PCOL Oliver Sotto Navales, ang Provincial Director sa Bukidnon PPO, ngadto kang PBGEN Christopher Nortez Abrahano, ang Regional Director sa PRO-10, nasayran nga ang maong suspek nalambigit sa pagpangawat sa opisina sa Center for Women and Children in Crisis sa Everlasting Village, Poblacion, Pangantucan.
Base sa imbestigasyon sa Pangantucan Municipal Police Station, nasurpresa sa 30-anyos nga biktima ang suspek nga migawas sa luyo nga pultahan sa iyang opisina pasado alas 7:30 sa buntag. Una nang namatikdan ang agi sa pugos nga pagsulod sa maong pasilidad, apan wala dayon mahibal-i kon duna ba’y nawala nga kagamitan.
Nahimo lamang nga dakong timaan sa kapulisan ang usa ka post sa Facebook diin nakita sa biktima nga gibaligya ang usa ka berde nga Lenovo laptop, nga mao diay ang kawat nga butang gikan sa iyang office drawer.
Pinaagi sa gikasang follow-up operation uban sa tabang sa usa ka saksi, nadakpan ang suspek samtang nagpaabot sa mopalit unta sa maong laptop. Human mapahibalo sa iyang mga katungod ubos sa Miranda Doctrine, gidala dayon ang suspek sa Pangantucan MPS kauban ang narekober nga ebidensya alang sa saktong dokumentasyon ug pagpasaka sa kasong Robbery.