Maitandi sa usa ka komedya sa telebisyon ang nahitabo sa usa ka lalaki sa Changsha, China nga nailhan isip si Mr. Yuan, human mabisto ang iyang dungan-dungan nga pagpakig-uyab sa 17 ka babaye tungod lamang sa usa ka aksidente sa sakyanan.
Imbis pamilya ang motungha sa ospital human manawag ang mga doktor sa iyang emergency contacts, nagtagbo ang iyang mga hinigugma nga pulos nagtuo nga sila ra ang tag-iya sa iyang kasingkasing.
Ang maong “kilig” nahimong “kalit nga kaguol” sa dihang nasayran sa mga babaye—lakip na ang usa nga aduna nay anak kaniya ug ang uban nga naghatag kaniya og dakong kantidad sa kwarta—nga sila gi-ilad ra diay.
Agig panimalos, inay nga mag-away, naghiusa ang mga babaye ug nagtukod og group chat nga gitawag og “Revenge Alliance” aron masiguro nga mapriso si Mr. Yuan sa kasong pagpanglimbong.
Ang maong viral nga insidente nagsilbing kataw-anan apan seryosong pahimangno batok sa mga “master of disguise” sa gugma nga naggamit sa emosyonal nga manipulasyon alang sa kwarta.