Duha ka punoan sa gituohang marijuana ang “napupo” sa usa ka mag-uuma, hinungdan nga daling nakig-alayon kini sa otoridad niadtong Abril 14, 2026, pasado alas 8:30 sa buntag.
Sa pakighinabi sa Bombo Radyo Malaybalay ngadto sa kapulisan, nasayran nga usa ka 54-anyos nga mag-uuma ang personal nga mitungha sa Damulog Municipal Police Station uban ang usa ka barangay kagawad aron itugyan ang maong mga tanom. Base sa imbestigasyon, nakit-an sa maong residente ang mga marijuana nga gitanom sa usa ka pinikas nga mineral water bottle ilawom sa usa ka uga nga kahoy nga gmelina samtang nag-atiman kini sa iyang umahan.
Gidayeg sa kapulisan ang maong mag-uuma tungod sa iyang pagka-matinud-anon, samtang ang mga narekober nga ebidensya gipadala na sa Bukidnon Provincial Forensic Unit 10 sa Malaybalay City alang sa laboratory examination. Sa pagkakaron, nagpadayon ang imbestigasyon aron masuta kon kinsa ang “plantito” nga responsable sa pagtanom niini sa maong dapit.