Gisaway sa usa ka legal expert ang pinakabag-ong State of the Nation Address (SONA) ni Pangulong Ferdinand Marcos Jr., ilabi na ang giingong kakulang sa klarong pamaagi o follow-through sa kampanya niini batok sa kurapsyon.
Matd ni Atty. Oscar S. Moreno, propesor sa balaod ug corporate lawyer nga bisan pa man og gipahayag sa Presidente nga “Let us end corruption now” ug ang tinguha niini nga wagtangon ang maong sistema, kulang gihapon kini sa lig-on nga pamaagi o mekanismo kon unsaon kini pagkab-ot.
Gidugang pa ni Atty. Moreno nga ang usa ka epektibong SONA angayang makapadasig ug makahatag og katin-awan sa katawhan kalabot sa mga angayang damhon gikan sa gobyerno, apan gipadayag niini ang iyang kabalaka kung nahimong igo ba kini aron makombinser ug makahatag og paglaom sa nasud.
Gihagit usab sa abogado ang publiko ug ang mga lokal nga panggamhanan sa Bukidnon, Misamis Oriental, Cagayan de Oro, ug uban pang dapit nga dili lang basta magsalig sa nasyonal nga kagamhanan.
Sumala pa niya, kinahanglan nga magbinantayon ug mag-amping ang lokal nga komunidad, ug dili usab angayang mag-agad o magsalig sa hingpit sa mga direktiba gikan sa taas.